Gal 1 | NdeIBE | STEP | UPhawuli umphostoli – ongathunywanga evela ebantwini loba ngumuntu, kodwa nguJesu Khristu loNkulunkulu uYise, owamvusayo kwabafileyo

Galatians 1

1 UPhawuli umphostoli – ongathunywanga evela ebantwini loba ngumuntu, kodwa nguJesu Khristu loNkulunkulu uYise, owamvusayo kwabafileyo – 2 labo bonke abazalwane abalami, Kumabandla aseGalathiya:

3 Umusa lokuthula akube kini kuvela kuNkulunkulu uBaba wethu laseNkosini uJesu Khristu, 4 owazinikelayo ngenxa yezono zethu ukuba asihlenge kulesisikhathi esibi, mayelana lentando kaNkulunkulu wethu uBaba, 5 udumo kalube kuye kuze kube laphakade. Ameni.

Kalikho Elinye Ivangeli

6 Ngiyamangala ukuthi limdela masinya kangaka lowo owalibiza ngomusa kaKhristu, njalo liphendukela evangelini elehlukileyo

7 elingasivangeli lakancane impela. Kusobala abanye abantu bayaliphazamisa njalo bazama ukungcolisa ivangeli likaKhristu.

8 Kodwa lanxa thina, loba ingilosi evela ezulwini, singatshumayela elinye ivangeli ngaphandle kwalelo esalitshumayelayo kini, kalahlwe kuze kube nini lanini! 9 Njengoba sesivele sitshilo, lakhathesi ngiyatsho futhi ngithi: Uma loba ngubani etshumayela kini elinye ivangeli ngaphandle kwalelo elalivumayo, kalahlwe kuze kube nini lanini!

10 Kambe sengizama ukuzuza ukwamukelwa ngabantu, loba uNkulunkulu na? Kumbe njalo ngizama ukuthokozisa abantu na? Aluba ngilokhu ngizama ukuthokozisa abantu, bengingayikuba yinceku kaKhristu.

Ubizo LukaPhawuli NguNkulunkulu

11 Ngithanda ukuba lazi, bazalwane, ukuthi ivangeli engalitshumayelayo kalisilutho olwenziwa ngabantu.

12 Kangilamukelanga emuntwini, njalo kangilifundiswanga; kodwa ngalamukela ngokwambulelwa nguJesu Khristu.

13 Ngoba selezwa ngempilo yami yakuqala yokholo lwesiJuda, ukuthi ngalihlukuluza kakhulu okunganani ibandla likaNkulunkulu ngazama lokulichitha. 14 Ngangiqhubeka ngokholo lwesiJuda ukudlula amaJuda amanengi ayintanga yami, njalo ngangitshisekela kakhulu imikhuba yabokhokho bami.

15 Kodwa kwathi uNkulunkulu, owangiphawulayo kusukela ekuzalweni kwami wasengibiza ngomusa wakhe, ethokoza 16 ukuba aveze iNdodana yakhe kimi, ukuze ngitshumayele phakathi kwabezizweni, kangibuzanga muntu. 17 Angizange ngiye eJerusalema ukuyabona labo ababengabaphostoli mina ngingakabi nguye, kodwa ngahle ngaya e-Arabhiya khonokho nje kwathi muva ngabuyela eDamaseko. 18 Emva kweminyaka emithathu, ngaya eJerusalema ukuba ngijwayelane loPhethro ngahlala laye izinsuku ezilitshumi lanhlanu. 19 Kangibonanga lamunye wabanye abaphostoli – uJakhobe kuphela umfowabo weNkosi. 20 Ngiyaqinisa kini phambi kukaNkulunkulu ukuthi lokhu engililobela ngakho akusimanga. 21 Muva ngaya eSiriya kanye laseKhilikhiya. 22 Mina siqu sami ngangingaziwa emabandleni aseJudiya akuKhristu. 23 Ayesizwa umbiko nje kuphela usithi: “Umuntu owayesihlukuluza kuqala khathesi usetshumayela ukholo ake wazama ukuluchitha: 24 Amdumisa uNkulunkulu ngenxa yami.